کابل/۴/قوس/۱۴۰۴ هـ.ل.
د افغانستان د ستراتيژیکو او سیمه ییزو مطالعاتو مرکز او په ازبکستان کې د نړيوالو پرمختللو مطالعاتو انسټيټوټ ترمنځ ناسته ترسره شوه. په دې ناسته کې، د ستراتيژیکو او سیمه ییزو مطالعاتو مرکز په استازولۍ د مرکز رییس ښاغلي دوکتور شاه رخ رؤوفي، د سياسي مطالعاتو ډيپارټمنټ مسؤل عبدالصبور مبارز، د دغه ډيپارټمنټ غړي عمران زکريا او د نړيوالو پرمختللو مطالعاتو انسټيټوټ په استازولۍ په دې انسټيټوټ کې د افغانستان او جنوبي اسيا د مطالعاتو د مرکز رئيس حمزه بولتايف برخه اخيستې وه.
په پيل کې د ستراتيژيکو او سيمه ييزو مطالعاتو مرکز رئيس دوکتور شاه رخ روؤفي خبرې وکړې، لومړی يې د مرکز لنډه معرفي وړاندې کړه او بيا يې د سيمې هېوادونو له څېړنیزو مرکزونو سره د ګډو څېړنو او همکاريو پر اهمیت ټينګار وکړ. استاد وويل: افغانستان له ازبکستان سره نه يوازې دا چې اقتصادي او سياسي اړيکې لري بلکې له تاريخي پلوه دواړه هېوادونه نږدې کلتوري او مذهبي اړيکې او تړاوونه لري او له همدې امله د دواړو هېوادونو ترمنځ نږديوالی حقيقي او مهم دی.
ورپسې په ازبکستان کې د نړيوالو پرمختللو مطالعاتو په انسټيټوټ کې د افغانستان او جنوبي اسيا د مطالعاتو د مرکز رئيس حمزه بولتايف خبرې وکړې او په خپلو خبرو کې يې افغانستان ته د سفر موخه په دې ډول بيان کړه: ازبکستان او افغانستان په حکومتي کچه سره اړيکې لري، همدارنګه د خلکو ترمنځ يې هم تګ او راتګ شته، د سوداګرو ترمنځ يې هم اړيکې موجودې دي، خو د دواړو هېوادونو ترمنځ اکاډميکې او علمي اړيکې کم رنګه دي او زما د سفر موخه همدا ده تر څو له بېلابېلو څېړنيزو مرکزونو او علمي ادارو سره وګورم او د دواړو هېوادونو ترمنځ د اکاډميکو اړيکو په رامنځته کولو کې همکاري وکړم.
په پای کې دواړو څېړنيزو مرکزونو پر ګډو څېړنو، سيمينارونو، کنفرانسونو، ويبنارونو، انلاين غونډو او نورو دوه اړخيزو همکاريو تاکيد او هوکړه وکړه.