د ستراتېژیکو او سیمه ییزو څېړنو مرکز (CSRS) او د بحران او سیاستونو د څېړنو لپاره د انقرې مرکز (ANKASAM) ترمنځ د دوه اړخیزو همکاریو هوکړه لیک لاسلیک شو.
دغه هوکړه لیک د اګست په ۲۸مه (۲۰۲۱م) ترکیې ته د ستراتېژیکو او سیمه ییزو څېړنو مرکز د پلاوي د یوه رسمي سفر او له انکاسام څېړنیز مرکز څخه د لیدنې پر مهال د دواړو مرکزونو د رئیسانو له لوري لاسلیک شو.
د دغه هوکړه لیک له مخې به دواړه مرکزونه د تجاربو د تبادلې، د دواړو هېوادونو د څېړنیزو مرکزونو ترمنځ د همکاریو زیاتېدو، د ګډو سمینارونو او نورو پروګرامونو په برخو کې دوه اړخیزې همکارۍ ولري.
د یادولو وړ ده، چې د ستراتېژیکو او سیمه ییزو څېړنو مرکز تر دې مخکې هم د سیمې او نړۍ په کچه له بېلابېلو معتبرو څېړنیزو مرکزونو سره د ګډو همکاریو هوکړه لیکونه لاسلیک کړي، چې یو شمېر نور ترکي څېړنیز مراکز هم پکې شامل دي. د اقتصادي او اجتماعي څېړنو مرکز (ESAM)، د سوېلي آسیا د ستراتېزیکو څېړنو مرکز (GASAM)، په انقره کې د ایران د څېړنو مرکز (İRAM)، او د سیاسي څېړنو مرکز (BARQ) هغه څېړنیز مراکز دي، چې تر دې وړاندې ورسره هوکړه لیکونه لاسلیک شوي او له لارې یې ګډو همکاریو ته زمینه برابره شوې ده.
پای